RCC и европските партнери ја претставија првата сеопфатна анализа на стартап екосистемот на Западен Балкан
Советот за регионална соработка (RCC), во соработка со Европскиот институт за иновации и технологија (EIT) и Европската мрежа на претпријатија (EEN), го претстави извештајот „Стартап екосистемот на Западен Балкан на крстопат“, првата регионална анализа на стартап сцената во шесте економии на Западен Балкан.
Извештајот беше презентиран на министерскиот состанок на Платформата за истражување и иновации на Западен Балкан, коорганизиран од Европската комисија, полското претседателство со Советот на ЕУ и владата на Црна Гора.
Според наодите, ИКТ секторот во регионот вработува околу 150.000 луѓе и учествува со околу 2% во БДП, но стартапите во 2024 година обезбедиле само 29,5 милиони евра финансирање – значително помалку од нивните конкуренти во земјите-членки на ЕУ. Недостигот на приватен капитал, различните регулативи и континуираното иселување на таленти се наведени како главни пречки за развој.
Генералниот секретар на RCC, Амер Капетановиќ, изјави дека стартап екосистемот на Западен Балкан има голем потенцијал, но му недостасува системска поддршка за одржлив раст.
„Нашиот регион е полн со претприемачка енергија, но ни требаат структури за нејзино канализирање. Затоа го развивме концептот за регионална иновација за стартап извонредност – RISE – кој ги поврзува претприемачите со ментори, овозможува обука и микро-финансирање за надминување на раните ризици“, рече тој.
Заменик-директорката на Генералниот директорат за истражување и иновации на Европската комисија, Сигне Ратсо, истакна дека извештајот ја комбинира експертизата на трите институции во создавањето на поврзан иновациски екосистем.
„Работиме заедно за да ги намалиме нееднаквостите, да го зајакнеме претприемништвото и да им овозможиме на локалните иноватори да имаат пристап до Единствениот европски пазар на иновации,“ рече Ратсо.
RCC, EIT и EEN преку заедничките активности имаат за цел да го унапредат интегрирањето на регионот во европскиот иновациски простор – од развој на вештини и пристап до финансии, до прекугранично вмрежување преку Регионалната иновациска шема на ЕИТ и мрежата на претпријатија на ЕУ.
Капетановиќ учествуваше на состанокот заедно со Асе Горницка, претседателка на Здружението COST, и Мартин Керн, директор на Европскиот институт за иновации и технологија. Тој нагласи дека успехот на регионалната иновациска агенда зависи од заедничките напори на владите, академската заедница, бизнисите и граѓанското општество.
„Западен Балкан не треба само да учествува, туку да стане двигател на европскиот иновациски екосистем,“ додаде Капетановиќ.