Управниот суд во Скопје ја отфрли тужбата на политичката партија Левица со која бараше поништување на упатството што Агенцијата за аудио и аудиовизуелни медиумски услуги (АВМУ) го донесе на 26 септември во врска со медиумското известување за локалните избори во 2025 година.
„Тужбата на тужителот Политичка партија ‘Левица’ од Скопје за поништување на упатството на АВМУ се отфрла,“ се наведува во решението на Судот.
Во образложението, Судот посочува дека упатството не претставува поединечен управен акт, туку општ документ со кој се даваат насоки за примена на одредбите од Изборниот законик. Поради тоа, како што стои во решението, не може да биде предмет на управен спор.
„За да може еден управен акт да биде предмет на управен спор, тој треба да биде индивидуален и конкретен, донесен во управна постапка со која се решава за права и обврски на поединци или правни лица,“ се наведува во судското образложение.
Судот оцени дека упатството на АВМУ е донесено врз основа на законски овластувања и претставува општ акт, поради што тужбата на Левица се отфрла како недозволена.