Група од 55 европратеници од 19 земји-членки упатија писмо до претседателот на Европскиот совет, Антонио Кошта, барајќи од ЕУ веднаш да премине кон следната фаза на пристапни преговори со Молдавија, во потег што се толкува како обид за одвојување на молдавското прашање од застојот со Украина.
Писмото, иницирано од потпретседателот на Европскиот парламент Виктор Негреску, претставува најнова демонстрација на поддршка за европската иднина на Молдавија, по победата на прозападните партии на парламентарните избори одржани во неделата. „Ова е пресвртница што бара подеднакво силен и брз одговор од ЕУ,“ се вели во документот, со кој европратениците повикуваат отворањето на кластерите од acquis-от веднаш да биде ставено на агендата на Советот.
Негреску нагласи дека ваквиот чекор е јасен сигнал за признавање на спроведените реформи и на изразената волја на граѓаните. Писмото оценува дека резултатите од „слободни и фер избори“ ја потврдуваат определбата на Молдавија кон Унијата, и покрај притисоците и дезинформациските кампањи однадвор.
„Оваа одлука е не само логичен следен чекор, туку и стратешка инвестиција во регионалната стабилност, безбедност и просперитет,“ наведуваат европратениците, додавајќи дека ќе испрати порака дека процесот на проширување е кредибилен и заснован на реални реформи.
Хрватската комесарка за проширување Марта Кос претходно изјави дека Украина и Молдавија треба заедно да го отворат првиот преговарачки кластер, но иницијативата на европратениците намерно ја избегнува темата Украина. Унгарија, која јавно се противи на украинското членство, го блокира процесот на Советот, што создава неизвесност за заедничко отворање на преговорите.
Премиерот Виктор Орбан неодамна оцени дека за Украина „премногу е“ да стане членка и предложи наместо тоа да склучи стратешко партнерство со ЕУ – став кој останува во спротивност со позициите на мнозинството членки. Кошта, пак, ја разгледува можноста за користење квалификувано мнозинство за одобрување на отворањето на кластерите, што би овозможило заобиколување на унгарското вето. Во овој контекст шанса бара и Северна Македонија, која од 2020 се соочува со вето од Бугарија заради непочитување на Договорот за добрососедство (2017) и Францускиот предлог (2022).