Американската амбасадорка во Северна Македонија, Анџела Агелер, рече дека односите меѓу САД и Северна Македонија се темелат на заеднички вредности, а не само на геополитички интереси. Таа го изнесе ставот во интервју за ТВ21, во емисијата „Клик Плус“.
„Првата и најважна заедничка вредност е вербата во демократијата. Иако нашите влади се различни, еднакво ги вреднуваме индивидуите и заедниците“, рече Агелер, истакнувајќи дека институционалната стабилност и владеењето на правото остануваат главен предизвик.
Таа посочи дека економскиот развој претставува втор клучен столб на соработката. „Посилната економија на Северна Македонија е од корист не само за граѓаните туку и за САД, носејќи стабилност и сигурност“, додаде амбасадорката.
Безбедноста и членството на Северна Македонија во НАТО, според Агелер, се дополнителни елементи на силното партнерство. Таа го оцени членството во НАТО како „огромно достигнување“ и подвлече дека државата е значаен сојузник за јакнење на трансатлантските односи и европската стабилност.
Агелер исто така изјави дека е неопходна поголема практична посветеност на принципите што ги обединуваат двете земји и повика на конкретни чекори, особено во однос на владеење на правото.