Украинскиот претседател Володимир Зеленски ги поздрави предложените измени на контроверзниот 28-точков план за прекин на војната со Русија, откако европските сојузници на Украина отфрлија делови кои, според Киев, му оделе во прилог на Москва.
„Сега листата на неопходни чекори за завршување на војната може да стане остварлива… Во оваа рамка се вградени многу исправни елементи“, напиша Зеленски на Телеграм.
Неколку часа по изјавата, градоначалникот на Киев, Виталиј Кличко, соопшти дека руски ракетни и дрон-напади погодиле станбена зграда во главниот град и предизвикале прекини во снабдувањето со електрична енергија и вода. Министерството за енергетика потврди „масовен, комбиниран непријателски напад“ врз енергетската инфраструктура.
САД и Украина разговараа за планот на средба во Женева во неделата. Планот, изработен од американски и руски претставници во октомври, предизвика загриженост во Киев и во европските главни градови. Русија не учествуваше на разговорите.
Кремљ во понеделник ги отфрли измените како „целосно неконструктивни“.
Во Вашингтон, портпаролката на Белата куќа, Каролин Левит, истакна дека администрацијата на претседателот Доналд Трамп „еденкво се ангажира со двете страни“ во обид да го прекине конфликтот, отфрлајќи ги тврдењата дека Вашингтон зазема страна во корист на Москва. Трамп, рече таа, е „оптимист“ дека може да се постигне договор.
Трамп на социјалните мрежи објави дека „можеби се случува нешто добро“, но додаде: „Не верувајте додека не го видите“.
Американскиот државен секретар Марко Рубио во Женева негираше дека првичниот 28-точков план бил напишан во Кремљ, иако неколку негови елементи беа во линија со долгогодишните руски барања.
Зеленски во понеделник навечер рече дека ревидираниот план претставува „навистина вистински пристап“. Најави дека чувствителните точки ќе ги дискутира директно со Трамп, без да прецизира кога.
Според украински функционер, првичниот документ веќе не постои. Украинскиот заменик-министер за надворешни работи Серхиј Кислица изјави за Financial Times дека најновата верзија има 19 точки, при што најспорните прашања – вклучително и територијалните отстапки – ќе бидат препуштени на лидерите.
Британскиот премиер Киер Стармер најави виртуелен состанок на европските сојузници на Украина во вторник за да ги разгледаат случувањата. Тој додаде дека останува работа за да се постигне „праведен и траен мир“.
Рускиот претставник Јуриј Ушаков рече дека европскиот предлог „на прв поглед е целосно неконструктивен и не е прифатлив за нас“.
Зеленски претходно предупреди дека „главниот проблем“ останува барањето на претседателот Владимир Путин Украина правно да го признае руското присуство на окупираните територии.
Изјавите на Трамп дека Украина има рок до 27 ноември да го прифати договорот или да ризикува губење на американската поддршка предизвикаа чувство на итност во Европа и доведоа до брзо свикување на разговорите со САД.
Контра-предлозите, за кои се верува дека ги изработиле Британија, Франција и Германија, исклучуваат какво било признавање на руската контрола врз окупираните региони, предвидуваат поголема дозволена бројност на украинската армија и оставаат можност за украинско членство во НАТО.
Русија бара целосно украинско повлекување од Донбас – Донецк и Луганск – и ја контролира Крим, како и големи делови од Херсон и Запорожје.
Од почетокот на руската инвазија пред речиси четири години, убиени или ранети се десетици илјади војници и илјадници цивили, а милиони луѓе беа принудени да ги напуштат своите домови.