Американскиот претседател Доналд Трамп изјави дека војната со Иран е „добиена“ и дека има напредок кон договор. Извори упатени во разговорите велат за меѓународните медиуми дека постојат ограничени контакти меѓу Вашингтон и Техеран, иако борбите продолжуваат.
Ирански извор изјави дека имало „приближување“ иницирано од САД во последните денови, но дека разговорите сè уште не достигнале ниво на формални преговори. Според истиот извор, преку посредници се разменуваат пораки за можен договор што би довел до трајно завршување на конфликтот, а не само прекин на огнот.
Техеран, како што се наведува, е подготвен да разгледа „одржливи“ предлози кои ги штитат националните интереси, вклучително и укинување на санкциите, како и гаранции дека неговата нуклеарна програма ќе остане мирољубива.
Паралелно, воените операции продолжуваат. Израелската војска соопшти дека извела нови напади врз цели во Иран, вклучително и во Исфахан, додека Иран извршил повеќекратни ракетни напади врз Израел во текот на ноќта. Израелските власти соопштија дека биле лансирани седум бранови ракети за помалку од 10 часа.
Во јужен Израел, четири лица, меѓу кои и две бебиња, биле повредени кога дел од ракета погодил бедуинска населба, соопштија службите за итна помош.
Конфликтот има и пошироки регионални и економски последици. Во Ирак, најмалку 15 лица загинаа во воздушни напади врз проирански милиции, додека во Либан властите одлучија да го протераат назначениот ирански амбасадор поради „кршење на дипломатските норми“.
Економските ефекти се чувствуваат глобално. Според податоци на S&P Global, деловната активност во Европа и Велика Британија забавува, додека инфлацијата расте поради поскапувањето на енергенсите и нарушувањата во синџирите на снабдување.
Цената на нафтата повторно се искачи над 100 долари за барел, откако новите судири ги намалија очекувањата за брз крај на војната.
Во меѓувреме, регионални актери ги изнесуваат своите позиции. Саудиска Арабија сака конфликтот да заврши со значително намалување на иранските ракетни капацитети, според извор запознаен со ставот на Ријад, но истовремено предупредува дека не треба да биде погодена цивилната инфраструктура.
И покрај сигналите за можни дипломатски напори, израелски претставник изјави дека договор за крај на војната „во моментов не е на дофат“, додека воените операции продолжуваат со „целосен интензитет“.