Рускиот нафтен гигант Лукоил соопшти дека постигнал договор за продажба на поголемиот дел од своите странски средства, проценети на околу 22 милијарди долари, на американската приватна инвестициска компанија Carlyle Group, во трансакција која е условена со одобрение од американските регулаторни власти.
Лукоил, вториот најголем производител на нафта во Русија, се наоѓа под американски санкции поради војната во Украина, а Министерството за финансии на САД му даде рок до 28 февруари да го продаде својот меѓународен бизнис.
Доколку трансакцијата биде одобрена, таа ќе стави крај на децениската стратегија на меѓународна експанзија на Лукоил, кој е руска компанија со најголема изложеност на глобалните енергетски пазари.
Во соопштението, Лукоил наведе дека се согласил со Carlyle да ја продаде својата подружница LUKOIL International GmbH, која управува со странските средства на компанијата. Во нив спаѓаат операции во Европа, Блискиот Исток, Африка, Централна Азија и Мексико – од контролен удел во огромното нафтено поле West Qurna 2 во Ирак, до рафинерии во Бугарија и Романија.
„Потпишаниот договор не е ексклузивен и е предмет на исполнување на одредени предуслови, вклучително добивање на неопходни регулаторни одобренија, меѓу кои и согласност од Канцеларијата за контрола на странски средства (OFAC) при Министерството за финансии на САД“, соопшти Лукоил.
Од Carlyle Group потврдија дека договорот е условен од детална проверка (due diligence) и одобренија од надлежните регулаторни тела.
ПРИТИСОК ОД САНКЦИИТЕ
Лукоил и најголемиот руски производител на нафта, Роснефт, беа ставени под американски санкции во октомври минатата година, поради, како што соопшти Вашингтон, бавниот напредок во мировните преговори меѓу Русија и Украина.
Санкциите се дел од стратегијата на американскиот претседател Доналд Трамп да изврши притисок врз Москва да прифати договор за прекин на конфликтот, најсмртоносната војна во Европа од Втората светска војна наваму.
Извори блиски до процесот наведуваат дека најмалку десетина потенцијални купувачи изразиле интерес за средствата на Лукоил, меѓу кои американските нафтени гиганти Exxon Mobil и Chevron, конгломератот IHC од Абу Даби, како и саудиската Midad Energy.
Carlyle Group управува со средства во вредност од 474 милијарди долари, распоредени во три деловни сегменти и над 660 инвестициски фондови.
КАЗАХСТАНСКИТЕ СРЕДСТВА СЕ ИЗЗЕМЕНИ
Лукоил соопшти дека договорот не ги опфаќа неговите средства во Казахстан.
Властите во Астана потврдија дека во средата поднеле официјална понуда до американските власти за преземање на уделите на Лукоил во казахстанските енергетски проекти. Тие вклучуваат удел во Caspian Pipeline Consortium (CPC) – главниот извозен коридор за казахстанската нафта – како и во најголемото нафтено поле во земјата, Тенгиз.
Американското Министерство за финансии досега блокираше два обида за продажба на странските средства на Лукоил – прво договорот со швајцарската трговска група Gunvor во октомври, а потоа и предложената размена на удели посредувана од Xtellus Partners во декември.