Агенцијата за аудио и аудиовизуелни медиумски услуги утврди уреднички пропуст и прекршување на закон по емитување на детска музичка програма на МРТ 2 што содржела националистички и иредентистички пораки, соопшти регулаторот.
Спорната содржина била дел од фестивалот „Билбилите на Кораб“, емитуван на 28 март, во кој деца изведувале песни на албански јазик. Во фокусот на надзорот била изведбата на песната „Албански територии (Trojet Shqiptare)“, која предизвика реакции во јавноста.
Според извештајот, изведбата вклучувала визуелни и симболички елементи поврзани со концептот за „Голема Албанија“, како и пораки што, според регулаторот, поттикнуваат нетрпеливост врз основа на национална и етничка припадност.
Агенцијата оцени дека прикажувањето на вакви содржини во програма наменета за деца претставува обид за индоктринација и злоупотреба на малолетници за политички цели, што е спротивно на принципите на соживот и толеранција.
Со надзорот е утврдено прекршување на член 48 од Законот за аудио и аудиовизуелни медиумски услуги, кој забранува содржини што поттикнуваат омраза и нетолеранција.
Регулаторот посочи дека дополнителна тежина дава фактот што програмата била емитувана на јавниот сервис со национална покриеност, што, според него, укажува на сериозен системски пропуст во уредувањето и контролата на програмата.
Случајот ќе биде разгледан на седница на Програмскиот совет на МРТ, закажана за утре, на која ќе се бара утврдување одговорност.
Претседателот на Советот Давор Пашоски изјави дека ќе биде побарано од директорот на МРТ, Марјан Цветковски, да покрене дисциплинска постапка за утврдување одговорност за пропустот.
Регулаторот наведе дека при оценката биле земени предвид европските стандарди за говор на омраза и праксата на Европскиот суд за човекови права, оценувајќи дека ограничувањето на вакви содржини е законско и неопходно во демократско општество.
Случајот отвори прашања за уредничката контрола и одговорноста во јавниот радиодифузен сервис, особено во програми наменети за малолетна публика.