Најмалку осум пакистански полицајци се убиени во, како што ги опишаа властите, координирани напади извршени од осомничени белуџистански сепаратисти во неколку градови во југозападната пакистанска покраина Белуџистан.
Нападите започнале околу 3 часот по локално време во неделата, кога вооружени напаѓачи нападнале повеќе полициски станици во главниот град на покраината, Квета, соопштија безбедносни извори.
„Координирани напади со огнено оружје и самоубиствени напади се извршуваат низ Белуџистан, главно во Квета, Пасни, Мастунг, Нушки и округот Гвадар“, изјави висок безбедносен функционер со седиште во Квета за агенцијата АФП, барајќи анонимност бидејќи не бил овластен да зборува со медиумите.
Според него, нападите „пропаднале поради лошо планирање и брза реакција на безбедносните сили“, без да прецизира број на жртви. Локалните власти, меѓутоа, потврдија дека најмалку осум полицајци го загубиле животот.
Безбедносни извори наведуваат дека дел од припадниците на пакистанските безбедносни сили биле киднапирани. Интернет-услугите и железничкиот сообраќај во неколку делови од покраината се суспендирани, додека е во тек широка безбедносна операција.
Одговорноста за нападите ја презеде Белуџистанската ослободителна армија (BLA), најактивната сепаратистичка група во покраината, која соопшти дека цел на нападите биле воени објекти, полицијата и претставници на цивилната администрација. Пакистанската влада засега не го коментираше ова тврдење.
Нападите се случија еден ден откако пакистанската армија соопшти дека убила 41 вооружен борец во две одделни операции во Белуџистан, најсиромашната покраина во земјата, и покрај значајните, но недоволно искористени природни ресурси.
Пакистан со децении се соочува со сепаратистичко движење во Белуџистан, каде бунтовниците често ги напаѓаат државните сили, странските државјани и работници од други делови на земјата. Во последните години се засилија и нападите врз странски енергетски компании, за кои сепаратистите тврдат дека ги експлоатираат богатствата на регионот.
Минатата година, белуџистански сепаратисти нападнаа воз со околу 450 патници, што доведе до дводневна опсада во која беа убиени десетици лица.