Зохран Мамдани (34) положи заклетва како нов градоначалник на Њујорк кратко по полноќ во затворена церемонија одржана во напуштената метро-станица „Олд Сити Хол“, со што започна ден исполнет со јавни настани и прослави по повод неговото стапување на функцијата.
Мамдани беше заколнат од државната јавна обвинителка на Њујорк, Летитија Џејмс, во присуство на неговата сопруга Рама Дуваџи, членови на неговото потесно семејство, вклучувајќи ја неговата мајка, режисерката Мира Наир, и таткото Махмуд Мамдани, професор по африкански студии на Универзитетот Колумбија.
„Ова е чест и привилегија на животот“, изјави Мамдани по церемонијата, додавајќи дека изборот на локацијата ја симболизира важноста на јавниот превоз за градот.
Како дел од настанот, Мамдани го претстави новиот комесар за транспорт на Њујорк, Мајк Флин, долгогодишен урбанист, истакнувајќи дека има цел јавниот транспорт во градот да стане „пример за целиот свет“.
На церемонијата присуствуваше и заминувачкиот градоначалник Ерик Адамс, кој изјави дека сака да ја демонстрира „мирната и уредна транзиција на власта“.
Во согласност со неговата муслиманска вера, Мамдани положи заклетва врз Куранот, станувајќи првиот градоначалник на Њујорк кој го направил тоа. Тој ја положи заклетвата со рака врз Куранот на неговиот дедо, како и врз примерок кој му припаѓал на црниот писател и историчар Артуро Шомбург, соопштија американски медиуми.
На полноќниот настан присуствуваа и јавни личности и активисти избрани од инаугурацискиот комитет, меѓу кои актерот Џон Туртуро и писателот Колсон Вајтхед.
Подоцна во текот на денот, Мамдани ќе биде јавно претставен на церемонија во 13 часот по локално време, каде што ќе го воведе конгресменката Александрија Окасио-Кортез, а ќе положи јавна заклетва пред сенаторот Берни Сандерс.
Канцеларијата на Мамдани соопшти дека изборот на старата метро-станица ја одразува неговата „посветеност кон работниците кои секојдневно го одржуваат градот во функција“.
Мамдани, демократ и припадник на Демократските социјалисти, ја освои функцијата во ноември со 50,78% од гласовите, победувајќи го републиканскиот кандидат Кертис Слива и поранешниот гувернер Ендрју Куомо, кој настапи како независен кандидат.
Неговата изборна победа следеше по кампања насочена кон прашања на животниот стандард, вклучувајќи замрзнување на кириите, бесплатен јавен превоз и проширување на програмите за ментално здравје, поддржана од широка волонтерска мрежа и силно присуство на социјалните мрежи.
„Овој град им припаѓа на неговите луѓе“, изјави Мамдани во победничкиот говор по изборите.