Германија, Франција, Италија, Полска и Обединетото Кралство ќе развиваат заеднички нискобуџетни автономни дронови за зајакнување на воздушната одбрана на НАТО, соопштија министрите за одбрана на земјите, во услови на растечки безбедносни предизвици од Русија.
Министрите од т.н. група Е5 најавија иницијатива наречена „Low-Cost Effectors and Autonomous Platforms“ (LEAP), со цел новите системи да бидат произведени во рок од една година.
„Заедно располагаме со една од најдобрите опреми во светот за пресретнување воздушни закани“, изјави британскиот заменик-министер за одбрана Лук Полард по состанокот во Краков. „Ова е првиот чекор од серија иницијативи што очекуваме да следат“, додаде тој.
Според него, програмата претставува „повик за мобилизација“ на одбранбената индустрија во сите пет држави за да одговори на новите закани.
Иницијативата следи по зголемената загриженост за безбедноста на европското небо, по низа инциденти минатата година – од летови на руски борбени авиони над Естонија до навлегување на рој дронови во полскиот воздушен простор. Иако заканите биле неутрализирани, Алијансата се соочи со критики дека користи борбени авиони вредни милиони долари за соборување дронови што чинат само илјадници.
„Предизвикот е ефикасно да се неутрализираат релативно евтини ракети, дронови и други закани“, рече Полард, нагласувајќи дека одбранбените трошоци мора да бидат усогласени со цената на заканата. Тој додаде дека иницијативата подразбира нова повеќемилионска инвестиција од петте земји.
Планот главно ќе се фокусира на производство на т.н. „ефектори“ – воен термин за дел од системот што дејствува врз целта, како што е експлозивниот товар.
Проектот е дел од пошироките европски напори за преземање поголема одговорност за сопствената одбрана, во услови на притисок од администрацијата на Доналд Трамп и сомнежи околу долгорочната посветеност на Вашингтон кон НАТО.
„Европа е мотивирана да оди напред во одбраната“, изјави полскиот министер за одбрана Владислав Косинјак-Камиш.