Пратеници на Демократската унија за интеграција (ДУИ) во Собранието на Северна Македонија денеска поднесоа Предлог-резолуција со која се повикува на почитување на стандардите на редовна и правична постапка во меѓународниот судски процес против поранешни раководители на институциите на Косово.
Во соопштение на ДУИ се наведува дека резолуцијата се темели на уставните принципи и меѓународните стандарди на правдата и повторно ја потврдува посветеноста кон владеењето на правото, независноста на судството и целосното почитување на основните човекови права.
Во текстот се упатува на Европската конвенција за човекови права, Меѓународниот пакт за граѓански и политички права и Универзалната декларација за човекови права, нагласувајќи дека судските процеси што се водат пред Специјализираните совети на Косово треба да се одвиваат во согласност со највисоките меѓународни стандарди.
Предлог-резолуцијата повикува на гарантирање на презумпцијата на невиност, обезбедување ефективна одбрана и судење во разумен рок за сите обвинети.
Дополнително, во соопштението се наведува дека документот го вреднува придонесот на институционалните лидери и припадниците на поранешната Ослободителна војска на Косово во процесите на мир, стабилност и евроатлантска интеграција на регионот, истакнувајќи дека меѓународната правда треба да биде непристрасна, професионална и независна од политички влијанија.
Пратениците потписници ги повикаа сите пратеници во парламентот, без оглед на политичката припадност, да ја поддржат резолуцијата.