Катарската енергетска компанија „КатарЕнерџи“ ги известила своите купувачи дека нема да може да ги исполни договорените испораки на течен природен гас (LNG), повикувајќи се на клаузулата за „виша сила“, потег што сигнализира можен нов притисок врз глобалниот енергетски пазар.
Одлуката доаѓа во време на растечки тензии на Блискиот Исток и нарушувања во поморскиот сообраќај низ Ормускиот теснец, еден од најважните светски енергетски коридори.
Според извори од индустријата, суспензијата на испораките може да предизвика поостра конкуренција меѓу купувачите во Европа и Азија за ограничените количини течен природен гас на глобалниот пазар.
„КатарЕнерџи“ не даде детали колку долго би можело да трае прекинот на испораките. Извори од енергетскиот сектор велат дека процесот на втечнување на гасот во Катар може да биде сериозно нарушен и дека обновувањето на нормалното производство би можело да потрае со недели.
Развојот на настаните доаѓа во период на силна нестабилност на светските енергетски пазари, поради ескалацијата на конфликтот меѓу САД и Израел со Иран, што ги зголеми стравувањата од долготрајни прекини во снабдувањето со нафта и гас.
Цените на нафтата и гасот на глобалните пазари пораснаа во последните денови, додека инвеститорите се загрижени дека евентуално затворање или ограничување на сообраќајот низ Ормускиот теснец би можело дополнително да ја наруши енергетската логистика.
Ормускиот теснец, кој го поврзува Персискиот Залив со Индискиот Океан, е клучна транзитна точка за околу една петтина од светската трговија со нафта и значителен дел од глобалниот извоз на течен природен гас.