Бахреин предложи нацрт-резолуција во Советот за безбедност на ОН со која би им се дозволило на државите да користат „сите неопходни средства“ – дипломатски термин што вклучува и употреба на сила – за заштита на трговскиот поморски сообраќај во и околу Ормускиот Теснец, пишува Ројтерс.
Дипломати наведуваат дека нацртот е поддржан од други арапски држави од Заливот и од САД, но оценуваат дека има мали шанси да биде усвоен, со оглед дека Русија и Кина најверојатно би ставиле вето.
Франција во понеделникот вечерта достави алтернативен, поумерен нацрт, исто така виден од Ројтерс, што укажува на растечка загриженост во регионот дека Иран може да продолжи да го загрозува Ормускиот Теснец – стратешки теснец низ кој поминува околу една петтина од светските испораки на нафта.
Пловидбата низ теснецот речиси е запрена откако Иран погоди бродови во рамки на конфликтот со САД и Израел.
Бахреинскиот нацрт ги оценува дејствијата на Иран како закана за меѓународниот мир и безбедност и бара Техеран „веднаш да ги прекине сите напади врз трговски и комерцијални бродови“, како и обидите за попречување на слободата на навигација.
Текстот предвидува овластување за државите, самостојно или преку доброволни мултинационални поморски коалиции, да користат „сите неопходни средства“ во и околу Ормус – вклучително и во територијалните води на крајбрежните земји – со цел да се обезбеди непречено поминување и да се спречат блокади на меѓународната пловидба.
Резолуцијата, исто така, изразува подготвеност за воведување мерки, вклучително и таргетирани санкции.
Нацртот е поставен под Глава VII од Повелбата на ОН, што му овозможува на Советот да одобри мерки од санкции до употреба на сила.
Сепак, двајца европски и еден западен дипломат изјавија дека шансите за усвојување се минимални, бидејќи Русија и Кина, сојузници на Иран, најверојатно би го блокирале текстот. За усвојување е потребно најмалку девет гласа „за“ и да нема вето од постојаните членки – Русија, Кина, САД, Велика Британија и Франција.
Францускиот предлог не го споменува Иран и не е под Глава VII. Наместо тоа, тој „ги повикува сите страни да се воздржат од понатамошна ескалација“, бара прекин на непријателствата во Персискиот Залив, Ормускиот Теснец и Оманскиот Залив, и повикува на враќање кон дипломатијата.
Наместо овластување за употреба на сила, францускиот текст ги охрабрува државите со интерес во поморските рути да координираат строго одбранбени мерки за обезбедување на безбедноста на навигацијата, вклучително и придружба на трговски бродови, во согласност со меѓународното право.
Францускиот претседател Емануел Макрон претходно изјави дека секоја акција во Ормус треба да се одвива во рамки на ОН и само по смирување на тензиите и со согласност на Иран.
Според тројца американски претставници, околу 2.500 маринци, заедно со амфибискиот нападен брод „УСС Боксер“ и придружни воени бродови, ќе бидат распоредени во регионот, иако нивната точна улога не е објавена. Двајца од нив додадоа дека сè уште нема одлука за евентуално испраќање копнени сили во Иран.