Одделот за внатрешна контрола при Министерството за внатрешни работи утврдил пропусти во постапувањето на 39 полициски службеници по пријави за семејно насилство поврзани со случајот на Ивана Јовановска од Скопје, која на почетокот на март почина по пад од балкон заедно со својата шестгодишна ќерка, соопштија властите.
Известувањето за утврдените пропусти е доставено до Основното јавно обвинителство за гонење организиран криминал и корупција и ќе биде разгледувано од обвинител во специјализираното одделение задолжено за кривични дела сторени од лица со полициски овластувања и припадници на затворската полиција.
Според МВР, полициските службеници не постапиле соодветно по претходно поднесените пријави за семејно насилство против сопругот на починатата.
Од обвинителството потврдија дека известувањето е примено и дека ќе се преземат понатамошни дејствија во согласност со надлежностите.
Во меѓувреме, во Основниот кривичен суд Скопје започна судењето против сопругот на Јовановска, кој се товари за повеќе кривични дела. Обвинетиот призна вина за нанесување телесна повреда и загрозување на безбедноста, но не и за делото „наведување на самоубиство“.
Судењето го води судија Ивица Стефановски, а следното рочиште е закажано за утре.