Лидерот на Демократско движење (ДД), Изет Меџити, соопшти дека партијата влегува во нова фаза на организациска трансформација и најави зајакнување на коалицијата ВЛЕН како „обединет политички фронт“.
Меџити информира дека била одржана проширена средба со членовите на Основачкиот совет на партијата, раководствата на младинскиот и женскиот форум, пратениците, како и со претставници на локално и централно ниво.
„Стануваше збор за работна средба на одговорност и визија. Отворено разговаравме за реорганизацијата на партијата, за јакнењето на структурите на терен, за организациската дисциплина и за политичката јасност што ја бара времето“, наведе Меџити во соопштение.
Тој додаде дека ДД ќе гради „помодерна организација со посилни структури и подиректна комуникација со граѓаните“, со цел, како што рече, постигнување политичка победа и „вистинска промена“.
Во однос на коалицијата ВЛЕН, Меџити изјави дека пред партиските структури биле транспарентно презентирани сите разговори поврзани со соработката во рамки на коалицијата, вклучително и заедничката визија, предизвиците и конкретните чекори за нејзино зајакнување.
Според него, трансформацијата на ЛД и на другите партии во рамки на ВЛЕН претставува „сериозен и стратешки процес“, насочен кон создавање модерна политичка организација со нови стандарди и обединета енергија.
„ВЛЕН е алтернатива што гарантира достоинство, развој и достојно претставување“, наведе Меџити, додавајќи дека коалицијата има за цел враќање на довербата на граѓаните преку конкретни политики.
ВЛЕН е дел од владејачкото мнозинство во Северна Македонија и беше создадено во пресрет на парламентарните избори во 2024 година за да ја победи ДУИ на Али Ахмети.