Опозицискиот СДСМ денеска најави поднесување на пакет законски решенија за намалување на цените на горивата и основните прехранбени производи, како одговор на последното поскапување на горивата.
Лидерот на СДСМ, Венко Филипче, рече дека пакетот вклучува четири предлог-закони: намалување на ДДВ за горивата од 18 на 5 отсто, намалување на акцизата за четири денари, укинување на ДДВ за основните прехранбени производи и дополнителни мерки за стабилизирање на цените.
„Премиерот Христијан Мицкоски не презема ништо, секој ден имаме само нова лага наместо конкретни мерки. Со нашите предлози, цените на нафтените производи ќе бидат намалени за околу 15 денари“, рече Филипче.
СДСМ побара Владата итно да ги прифати нивните предлози за да се запира кризата со цените. Повикот следи по најавата на Регулаторната комисија за енергетика за ново поскапување на горивата, кое ќе важи од полноќ.