Генералниот секретар на Меѓународната конфедерација на синдикати (ITUC), Лук Триангл, изјави дека синдикатите, работодавачите и Владата мора слободно да склучуваат колективни договори, а резултатите од нив да се почитуваат.
Триангл ја повика Владата и Собранието да ги реализираат зголемувањата на платите договорени со претходната влада, истакнувајќи дека работниците заслужуваат примања кои овозможуваат достоинствен живот.
„Работниците не се сами во својата борба за зголемување на платите. Поддршката доаѓа не само од Сојузот на синдикатите на Македонија, туку и од најголемата меѓународна конфедерација на синдикати“, се наведува во соопштението на ITUC.
Триангл, исто така, изрази загриженост поради извештаи за притисоци и кампањи насочени кон дискредитирање на синдикатите во земјата.