Универзитетот на Југоисточна Европа (УЈИЕ) и Министерството за здравство на Северна Македонија денес потпишаа Меморандум за соработка со цел развој на заеднички проекти во областа на образованието, научните истражувања и стручното усовршување во здравствениот сектор.
Меморандумот го потпишаа ректорот на УЈИЕ, проф. д-р Садудин Ибраими, и министерот за здравство, проф. д-р Азир Алиу, со што се воспоставува рамка за институционална соработка меѓу двете институции.
На церемонијата, ректорот Ибраими ја нагласи потребата од продлабочување на соработката меѓу академските и државните институции, особено во областа на образованието и научните истражувања во здравството. Министерот Алиу, пак, ја истакна улогата на Универзитетот на Југоисточна Европа во развојот на високото образование и во подготовката на стручен кадар за здравствениот систем.
Во рамки на посетата на универзитетот, министерот Алиу го посети и Факултетот за здравствени науки, каде што беше примен од деканката проф. д-р Данијела Војтикив-Самоиловска и академскиот кадар. Притоа беа презентирани наставните и техничките капацитети на факултетот, како и просториите и опремата што се користат во наставниот и практичниот процес.
На настанот присуствуваа и членови на универзитетското раководство, академскиот кадар на Факултетот за здравствени науки, како и претставници на Министерството за здравство.