Процесот на усвојување на заедничката позиција на Европската унија за извештајот за привремени мерки (IBAR) за Албанија, клучен чекор во пристапните преговори, сè уште е во рана фаза и нема временска рамка за негово финализирање, соопштија претставници на Советот на ЕУ.
IBAR претставува оценка на Европската комисија за тоа дали Албанија ги исполнува привремените критериуми во рамки на Кластер 1 – „Основи“, кој ги опфаќа владеењето на правото, судството, основните права, демократските институции и реформата на јавната администрација.
Позитивна оценка би овозможила напредок кон затворање на преговарачките поглавја, но Албанија не може да продолжи во процесот без ваква одлука.
Извештајот беше разгледан на состанок на Работната група за проширување (COELA), каде земјите-членки размениле ставови, поставиле прашања и добиле одговори од Европската комисија.
Се очекува претседателството со Советот да подготви компромисен текст за нацрт-привремената заедничка позиција на ЕУ, но процесот сè уште не е завршен.
Откако ќе се постигне согласност во рамки на COELA, текстот треба да биде одобрен од Комитетот на постојани претставници (COREPER), по што би можела да се одржи меѓувладина конференција со Албанија за формално потврдување на одлуката.
Албанија ги отвори пристапните преговори со ЕУ во јули 2022 година, заедно со Северна Македонија. Кластерот „Основи“ беше отворен во 2024 година, а останатите кластери во 2025 година.