Обединетите Арапски Емирати ќе ја напуштат Организацијата на земјите извознички на нафта (ОПЕК) и нејзиниот поширок формат ОПЕК+, со што се отвора нова фаза на тензии во Персискиот Залив во услови на глобална енергетска нестабилност.
Одлуката, која стапува на сила на 1 мај, доаѓа во период кога светот се соочува со последиците од конфликтот поврзан со Иран и нарушувањата во снабдувањето со енергенси.
Според официјалното соопштение на државната агенција, потегот ја одразува „долгорочната стратешка и економска визија“ на земјата, како и промените во нејзиниот енергетски профил.
Аналитичарите оценуваат дека станува збор пред сè за политичка порака. Експертите посочуваат дека чекорот сигнализира незадоволство од улогата и лидерството во рамки на организацијата, особено во однос на Саудиска Арабија, која важи за де факто лидер на групата.
Потегот на ОАЕ се смета за сериозен удар за единството на нафтениот картел, кој во изминатите години се обидуваше координирано да управува со производството и цените на глобалниот пазар.
Во услови на веќе зголемена нестабилност поради геополитичките тензии и нарушувањата во Ормускиот Теснец, излегувањето на ОАЕ дополнително ја усложнува ситуацијата и отвора прашања за идната координација меѓу големите производители на нафта.