Претседателот на СДСМ, Венко Филипче, изјави дека партијата ќе започне „чесна и одлучна“ политичка борба за враќање на власта и деблокада на европската интеграција на земјата, оценувајќи дека државата се наоѓа пред „голем испит“.
Говорејќи на свечена седница по повод 35-годишнината од формирањето на СДСМ, Филипче рече дека партијата се враќа со нова политичка понуда, заснована на „правда, солидарност и еднакви шанси“.
Тој ја обвини актуелната власт дека го блокира европскиот пат на државата, додавајќи дека евроинтеграцијата останува „врвен национален и државен интерес“.
„Нема поголем интерес од сојузите со Европската унија и НАТО“, изјави Филипче.
Тој предупреди дека застојот во евроинтеграциите може да доведе до економска стагнација и зголемено иселување на младите, нагласувајќи дека подобрувањето на животниот стандард, здравството и образованието се клучни приоритети.
Филипче истакна дека СДСМ има историска улога во носењето на одлуки поврзани со евроатлантските интеграции, и дека партијата ќе продолжи да се залага за „пристојна, праведна и европска држава“.