Контeјнерски брод во француска сопственост успешно го преминал Ормускиот теснец, што може да укаже дека Иран повеќе не ја смета Франција за „непријателска држава“, по критиките на францускиот претседател кон американската политика во конфликтот.
Бродот „Криби“, кој плови под знаме на Малта и е во сопственост на француската бродска компанија CMA CGM, го преминал стратешкиот воден пат на 2 април, покажуваат податоците за следење на бродови. Тоа е првиот француски брод што поминал низ теснецот откако започнаа американско-израелските напади врз Иран на крајот на февруари.
Преминот следува откако францускиот претседател јавно се дистанцираше од ставовите на американскиот претседател Доналд Трамп и ги отфрли предлозите за воено обезбедување на теснецот.
Тој изјави дека таквите планови се „нереални“, бидејќи би барале значително време и би ги изложиле бродовите на ризици од крајбрежни напади, вклучително и од иранските сили и ракетни капацитети.
Францускиот лидер повика на прекин на огнот и обновување на преговорите со Иран, додавајќи дека честите и контрадикторни изјави ја отежнуваат дипломатската динамика.
Не е јасно под кои услови бродот добил дозвола за безбедно минување, но податоците покажуваат дека пред преминот ја сменил дестинацијата во „Owner France“, што може да било сигнал до иранските власти за националноста на сопственикот.
Пред конфликтот, Ормускиот теснец беше клучна рута низ која се транспортираше околу една петтина од глобалната понуда на нафта и течен природен гас. Во моментов, сообраќајот низ теснецот останува сериозно нарушен поради пошироката криза на Блискиот Исток.
Изјавите и потезите на САД во конфликтот продолжуваат да предизвикуваат реакции и критики на меѓународната сцена, додека неизвесноста околу ескалацијата останува висока.