Француската јавност покажува значително помал интерес за љубовниот живот на своите политички лидери отколку пред една деценија, и покрај новите шпекулации поврзани со францускиот претседател Емануел Макрон, оценува „Политико“ во анализа објавена неделава.
Повод за текстот е книгата „(Речиси) совршен пар“ на новинарот на „Парис меч“, Флоријан Тардиф, во која се тврди дека сопругата на претседателот, Брижит Макрон, реагирала поради пораки на телефонот на Макрон со француско-иранската актерка Голшифте Фарахани.
Авторот наведува дека Макрон и Фарахани имале „платонски однос“, но додава дека дел од комуникацијата била премногу блиска. Сепак, приказната не предизвика значителен политички или медиумски потрес во Франција.
„Политико“ прави споредба со 2015 година, кога тогашниот претседател Франсоа Оланд беше во центарот на голем скандал откако магазинот „Closer“ објави фотографии од него како со скутер тајно ја посетува актерката Жили Гаје.
Тогаш француските медиуми со денови известуваа за аферата, а посебно внимание привлекоа и тврдењата дека обезбедувањето носело кроасани во станот на актерката.
Но денес, според анализата, француската јавност е далеку помалку заинтересирана за приватниот живот на претседателот Макрон, и покрај честите шпекулации и медиумски приказни.
Авторот иронично наведува дека современата француска политика можеби станала „помалку возбудлива“ поради недостигот од големи романтични скандали, додавајќи дека некогаш токму ваквите приказни биле дел од политичкиот фолклор во Франција.
Во Франција, приватниот живот на политичарите традиционално долго време се сметаше за тема во која медиумите ретко навлегуваат, но со развојот на таблоидите и социјалните мрежи таа практика постепено се промени.