Унгарскиот премиер Петер Маѓар изјави дека постојат знаци оти поранешниот полски заменик-министер за правда Марцин Романовски можеби избегал од Унгарија преку Србија.
Во интервју за ТВН24, Маѓар рече дека информацијата сè уште не е официјално потврдена.
„Разговарав со колегите и има индиции дека Романовски заминал преку Србија“, изјави Маѓар.
Романовски и поранешниот полски министер за правда Збигњев Зиобро се барани од обвинителството во Полска поради сомнежи за злоупотреба на средства од фонд наменет за жртви на криминал и за наводно користење шпионски софтвер против политички противници.
Двајцата добиле азил во Унгарија за време на владеењето на поранешниот премиер Виктор Орбан.
Маѓар изјави дека Зиобро ја напуштил шенген зоната еден ден пред неговата инаугурација.
Според информациите на Ројтерс, Зиобро моментално се наоѓа во САД, а американскиот заменик-државен секретар Кристофер Ландау наводно наредил да му биде олеснето добивањето американска виза.
Во меѓувреме, местото каде се наоѓа Романовски останува непознато.
Српското Министерство за надворешни работи засега нема коментар за наводите.
Маѓар денеска во Варшава треба да се сретне со полскиот премиер Доналд Туск и претседателот Карол Навроцки.
Според извори запознаени со разговорите, Полска планира да ѝ понуди на Унгарија пристап до американски течен природен гас преку новиот терминал во Гдањск, кој треба да почне со работа во 2028 година.
Маѓар изјави дека Будимпешта сака пониски цени за гасот што пристигнува како ЛНГ.
„Цената сè уште не е доволно конкурентна. Би биле најзадоволни ако транзитните такси бидат пониски или ако Европската унија помогне ЛНГ-гасот да стане поконкурентен“, рече Маѓар.