Министерството за здравство информираше дека е во тек постапката за усвојување на нова Стратегија за сексуално и репродуктивно здравје за периодот 2026–2030 година, придружена со Акциски план за имплементација за периодот 2026–2028.
Стратегијата е подготвена со поддршка од World Health Organization, Канцеларијата на УНФПА во Скопје и МАГО, со учество на граѓански организации, здравствени институции и релевантни министерства.
„Новата стратегија се темели на мултисекторски пристап кон унапредување на здравјето, интеграција на јавното здравје, образованието и социјалната заштита, усогласеност со политиките на Европската Унија и Националната програма за усвојување на правото на ЕУ, како и на фокус кон човековите права и еднаков пристап до здравствени услуги“, изјави Нермина Факовиќ, координатор за еднакви можности при Министерството за здравство, на 10-тиот состанок на секторската група за здравство.
Во документот се предвидени конкретни мерки и активности во неколку приоритетни области, како: планирање на семејството и третман на инфертилитет, безбедно мајчинство и здравје на новороденчиња, сексуално преносливи инфекции и малигни неоплазми, сексуално и репродуктивно здравје на адолесценти, родово базирано насилство и менопауза и кризни состојби.
Министерот за здравство Азир Алиу изјави дека во рамки на стратешкиот период 2026–2030 се предвидени неколку главни цели.
„Предвидено е подобрување на пристапот до здравствени услуги за сите граѓани, подигнување на јавната свест за сексуалното и репродуктивното здравје, јакнење на капацитетите на здравствениот систем, обезбедување интегрирани и квалитетни здравствени услуги, како и подобро управување со здравствените податоци и информации“, рече Алиу.
Од Министерството додаваат дека во процесот на консултации и финализирање на стратегијата се вклучени стручни здруженија, граѓански организации и пошироката јавност.