Потпретседателот на Собранието и висок функционер на ВМРО-ДПМНЕ, Антонио Милошоски, во средата го обвини шефот на Обвинителството за гонење организиран криминал и корупција (ОЈО ГОКК), Ислам Абази, дека „лаже“ во врска со одлуката да се запре постапката за набавката на мазут за ТЕЦ „Неготино“.
Милошоски рече дека одлуката за затворање на случајот претставува доказ за, како што наведе, влијанието што поранешни владини функционери и политички партии сè уште го имаат врз делови од обвинителството и судството.
„Ислам Абази лаже, затоа што како шеф е надлежен еднаш неделно да добива брифинг од подредениот обвинител за ваквите крупни случаи“, изјави Милошоски.
Тој додаде дека Абази имал можност случајот да продолжи да се гони или да биде предаден на друг обвинител, но наместо тоа, според него, дал согласност постапката да биде затворена.
„Наместо да биде обвинител кој ќе гони организиран криминал и корупција, Ислам Абази си ја препишал улогата на судија“, рече Милошоски.
Според него, случајот, кој го оцени како тежок предмет вреден 167 милиони евра, бил затворен врз „лукративно политички основи“, а не врз правни аргументи.
Обвинителството претходно соопшти дека постапката за набавките на мазут за ТЕЦ „Неготино“ е запрена бидејќи во истрагата не биле утврдени докази дека осомничените ги сториле кривичните дела за кои се гонеа.
Во предметот беа опфатени 13 лица, меѓу кои сопственикот на „Пуцко петрол“ Асмир Јахоски, сопствениците на компанијата „РКМ“ Ерџан Сулкоски и Ратко Капушевски, како и поранешниот директор на ЕСМ Васко Ковачевски.
Абази претходно на брифинг со новинари изјави дека не вршел влијание врз обвинителите во предметот.
Случајот предизвика политички реакции, откако премиерот Христијан Мицкоски рече дека бил „шокиран“ од одлуката за запирање на постапката и најави дека очекува предметот повторно да биде разгледан.