Граѓани во Македонија деновиве добиваат сомнителни пораки преку апликацијата „Вајбер“, во кои се повикуваат да се приклучат на наводна „ексклузивна група“ поврзана со крипто-платформата „Бајненс“ и да заработуваат „дневни стабилни приходи“.
Пораките пристигнуваат од непознати странски телефонски броеви, а содржат линкови до сомнителни интернет-страници кои не се поврзани со официјалната платформа на „Бајненс“.
„Честитки! Станавте специјално поканет корисник на ексклузивната група на Бајненс Македонија“, се наведува во една од пораките, по што следува линк за приклучување.
Експертите за сајбер-безбедност предупредуваат дека станува збор за класичен обид за интернет-измама и фишинг, со цел кражба на лични податоци, пристап до крипто-паричници или финансиска измама.
Измамниците најчесто користат лажни ветувања за брза заработка, имиња на познати компании, сомнителни линкови и психолошки притисок за брза реакција.
Од граѓаните се бара да не ги отвораат линковите, да не внесуваат лични или банкарски податоци и веднаш да ги блокираат и пријават ваквите контакти како спам.
Вакви крипто-измами во изминатиот период се регистрирани и во други европски земји, а најчесто се шират преку „Вајбер“, „Ватсап“, „Телеграм“ и „Фејсбук месинџер“.