Поранешниот унгарски премиер Виктор Орбан ја обвини актуелната влада на Петер Маѓар дека ги жртвувала националните интереси во замена за одмрзнување на милијарди евра европски фондови, додека Маѓар возврати дека единствената цена била ставање крај на корупцијата од времето на Орбан.
Спорот избувна откако премиерот Петер Маѓар и претседателката на Европската комисија, Урсула вон дер Лејен, објавија политички договор за ослободување на 16,4 милијарди евра европски средства за Унгарија.
Орбан преку социјалните мрежи побара од Маѓар да објасни „што им продал на Брисел“, тврдејќи дека таков договор не може да се постигне без отстапки.
„Што отстапивте од унгарските интереси за овие пари? Нема бесплатен ручек“, напиша Орбан.
Неговата партија Фидес тврдеше дека јавноста има право да знае дали владата прифатила барања поврзани со миграцијата, ЛГБТ-политиките, даночниот систем, цените на енергенсите и пензиската политика.
Од друга страна, Маѓар ги отфрли обвинувањата и изјави дека единствениот услов за деблокирање на средствата бил „целосно елиминирање на корупцијата од ерата на Орбан“.
„Имаше само една цена за враќање на 16,4 милијарди евра европски средства – крај на корупцијата од времето на Орбан. Унгарската влада со задоволство го прифати тој услов“, напиша Маѓар на Фејсбук.
Фидес во посебно соопштение го обвини Маѓар дека во странство ја оцрнува претходната влада со обвинувања за корупција, додека самиот, според партијата, бил вмешан во коруптивни случаи во периодот кога раководел со Центарот за студентски кредити.
Размената на обвинувања доаѓа во време на засилени политички тензии во Унгарија по изборната победа на Маѓар и неговите напори да ги нормализира односите со Брисел и да ги деблокира европските фондови што со години беа замрзнати поради спорови околу владеењето на правото и корупцијата.