Министерот за здравство Азир Алиу порача дека медицинските сестри и акушерките имаат клучна улога во здравствениот систем и општеството, нагласувајќи дека нивната професија претставува повеќе од работа – секојдневна грижа, хуманост и поддршка за пациентите.
На свечената академија во Тетово, организирана од Сојузот на здруженијата на медицински сестри, техничари, акушерки и стоматолошки сестри „За нас“, Алиу истакна дека медицинските сестри се „столбот на здравствената заштита“.
„Оваа недела е потсетник на огромната улога што медицинските сестри и акушерките ја имаат во здравствениот систем и во општеството во целина. Вашата професија не е само работа, туку секојдневна грижа, посветеност, хуманост и поддршка за пациентите и нивните семејства“, рече Алиу.
Тој нагласи дека без стручноста, пожртвуваноста и човечкиот пристап на медицинскиот персонал е невозможно да се замисли квалитетен здравствен систем.
„Без вашата стручност, пожртвуваност и човечки пристап е невозможно да се замисли квалитетен здравствен систем – од превенција и дијагностика, до лекување, рехабилитација и нега“, истакна министерот.
Во своето обраќање Алиу ја потенцираше и заложбата за подобрување на условите за работа, професионалниот развој и зајакнувањето на кадарот во јавните здравствени установи.
Тој упати благодарност до сите медицински сестри и акушерки за нивната професионалност, посветеност и секојдневна грижа за пациентите.