Министерот за правда Игор Филков изјави дека македонскиот јазик е уставна вредност и обврска за функционирањето на државата, реагирајќи по протестот на албанските студенти во Скопје кои бараат правосудниот испит да може да се полага и на албански јазик.
„Правото на протест е демократско, но никој нема право преку насилни протести да бара рушење на критериумите и стандардите во судството“, порача Филков.
Тој додаде дека Министерството за правда останува отворено за институционален дијалог, но нема да дозволи, како што наведе, девалвација на правниот систем и поткопување на улогата на македонскиот јазик како столб на државноста.
„Македонскиот јазик не е пречка. Тој е обврска, уставна вредност и гаранција за функционирањето на државата“, изјави Филков.
Реакцијата следува еден ден по протестот во Скопје, на кој илјадници албански студенти и граѓани побараа правосудниот испит да се полага и на албански јазик.
На протестот присуствуваа и студенти од Косово, а дел од учесниците носеа албански знамиња и транспаренти со пораки за јазична рамноправност.
Во меѓувреме, реакции пристигнаа и од политички претставници од регионот. Бившата претседателката на парламентот на Албанија, Елиса Спиропали, која беше и министерка за надворешни работи, оцени дека еднаквоста на Албанците во Северна Македонија не смее да се третира како политички компромис.
Поддршка за студентите изрази и амбасадорот на Албанија во Северна Македонија, Денион Меидани, кој порача дека барањето за достоинство не претставува закана.