Најмалку 90 лица загинаа во експлозија на гас во рудник за јаглен во северната кинеска провинција Шанси, јавија државните медиуми.
Несреќата се случила во рудникот „Лиушењу“, управуван од групацијата „Тонгжу“, во петокот вечерта околу 19:29 часот по локално време.
Во моментот на експлозијата во рудникот имало 247 работници.
Државната телевизија објави снимки од спасувачката операција на кои се гледаат медицински екипи и носилки, додека во близина биле распоредени амбулантни возила.
Повеќе од 100 лица се пренесени во болница, а спасувачките операции сè уште траат.
Кинескиот претседател повика да не се штеди напор за лекување на повредените и за пронаоѓање преживеани.
Тој нареди и итна истрага за причините за несреќата, како и одговорност за виновните.
Според државните медиуми, раководителите на рудникот биле приведени.
Причината за експлозијата сè уште не е официјално утврдена, но медиумите наведуваат дека нивото на јаглерод моноксид во рудникот било над дозволените граници.
Кинеското Министерство за вонредни состојби испратило 345 спасувачи од шест специјализирани тимови.
Провинцијата Шанси важи за центар на кинеската индустрија за јаглен и е една од најсиромашните региони во земјата.
Во изминатите две децении Кина воведе построги безбедносни стандарди во рударството, но тешки несреќи и натаму се случуваат.
Во 2023 година, при уривање на отворен рудник во Внатрешна Монголија загинаа 53 лица, додека во 2009 година повеќе од 100 рудари загинаа во експлозија во провинцијата Хејлунгџијанг.