Министрите за надворешни работи на земјите членки на НАТО ќе се состанат на 21 и 22 мај во Хелсингборг, Шведска, за да ги финализираат подготовките за Самитот во Анкара.
Во пресрет на состанокот, генералниот секретар на НАТО, Марк Руте, изјави дека сојузниците мора да го забрзаат исполнувањето на обврските преземени на Самитот во Хаг минатата година, кога беше договорено трошоците за одбрана да достигнат 5 проценти од БДП до 2035 година.
„Прашањето повеќе не е дали треба да направиме повеќе. Прашањето е колку брзо сојузниците можат да ги претворат обврските во капацитети“, рече Руте.
Тој повика на континуирано зголемување на инвестициите во одбраната и забрзување на производството на воена индустрија од двете страни на Атлантикот.
Руте истакна дека Европа и Канада преземаат поголема одговорност за конвенционалната одбрана во рамки на Алијансата.
Според него, ова се рефлектира и во командната структура на НАТО, каде Европа ќе раководи со сите три здружени команди, додека САД ќе ги задржат трите компонентни команди.
„Ќе продолжиме да ја гледаме оваа трансформација кон посилна Европа во посилно НАТО – НАТО 3.0“, изјави Руте.
Една од главните теми на самитот ќе биде и поддршката за Украина.
На состанокот во Хелсингборг ќе присуствува и украинскиот министер за надворешни работи Андриј Сибиха, со кого ќе се разговара за долгорочна, одржлива и предвидлива поддршка за Киев.
Руте порача дека главната цел на состанокот е „испорака“ на ветеното во одбраната, поддршката за Украина и безбедноста на земјите членки.
„Испорака на нашето одвраќање и одбрана, испорака на посилно и поправедно НАТО, испорака на поддршка за Украина и, на крајот, испорака на безбедност за една милијарда луѓе низ Алијансата“, рече генералниот секретар на НАТО.