Тант Мјинт-У, висок соработник на Фондацијата на Обединетите нации и автор на книгата „Миротворец“, предупредува дека светот влегува во период на опасна нестабилност, во кој слабее глобалниот консензус против војни и империјализам.
Во анализата за списанието „Форин аферс“, тој наведува дека повоениот светски мир бил изграден врз две клучни идеи — дека агресивните војни се недозволиви и дека империите мора да исчезнат.
Според него, токму тие принципи овозможиле да се избегне нова светска војна по 1945 година и да се создаде систем од речиси 200 суверени држави.
Авторот оценува дека денес тие „носечки столбови“ се распаѓаат.
Како примери ги наведува руската инвазија врз Украина, војната во Газа, конфликтите во Судан и Иран, како и растечката милитаризација и модернизација на нуклеарните арсенали.
Тој предупредува дека дипломатијата е сè послаба, а улогата на Обединетите нации во мировните процеси речиси исчезната.
„Вистинската катастрофа е напуштањето на принципите ‘без војна’ и ‘без империја’ од страна на државите и јавноста“, пишува Мјинт-У.
Во текстот се нагласува дека Обединетите нации во минатото одиграле клучна улога во спречување на ескалации меѓу големите сили.
Авторот потсетува на улогата на поранешните генерални секретари Даг Хамаршелд и У Тант во кризите околу Суец, Куба, Индија и Пакистан, како и во процесите на деколонизација.
Според него, токму државите од Азија и Африка по Втората светска војна ја трансформирале ОН во глобална институција што се спротивставувала на империјализмот и расната хиерархија.
Мјинт-У оценува дека по Студената војна Обединетите нации постепено станале инструмент на западниот либерален поредок, што дополнително ја ослабнало нивната независна мировна улога.
Тој наведува дека американската инвазија на Ирак во 2003 година сериозно го нарушила принципот против агресивни војни, додека подоцнежните интервенции ја поткопале довербата во меѓународниот систем.
Авторот повикува на обновување на улогата на ОН и враќање на принципите „без војна“ и „без империја“ во центарот на глобалната политика.
Според него, потребни се политички лидери кои ќе ги бранат овие вредности, поактивен генерален секретар на ОН и јавност која повторно ќе бара свет без војни и доминација.
„Овие принципи не се идеализам. Тие се темелите на единствениот период на вистински глобален мир што човештвото го создало“, пишува Тант Мјинт-У.