Делегацијата што американскиот претседател Доналд Трамп ја донесе во Пекинг повеќе потсетуваше на состанок на најголемите светски корпорации отколку на класична дипломатска мисија. Во авионот и на состаноците со кинеските власти беа присутни Илон Маск, директорот на „Епл“ Тим Кук, шефот на „Нвидиа“ Џенсен Хуанг, како и претставници на Волстрит и аеронаутичката индустрија.
Пораката од посетата беше јасна – економијата и бизнисот се во центарот на новото приближување меѓу Вашингтон и Пекинг, додека идеолошките разлики и геополитичките конфликти се турнати во втор план.
Трамп, кој во првиот мандат настапуваше како жесток критичар на Кина и ја обвинуваше за уништување на американските работни места, сега испраќа сосема поинакви пораки. Во пресрет на средбата со Си Џинпинг, тој го нарече кинескиот лидер „човек со извонредна визија“ и порача дека ќе побара Кина дополнително да се отвори за американските компании.
„Ќе побарам од претседателот Си да ја отвори Кина за овие брилијантни луѓе да можат да ја покажат својата магија“, напиша Трамп на својата платформа „Трут Соушл“.
Средбата меѓу двајцата лидери се одржува во услови на сериозни глобални тензии – од војната со Иран, преку трговските спорови, до прашањето за Тајван. Но, и покрај тие разлики, атмосферата во Пекинг беше внимателно режирана за да покаже блискост и стабилност.
Кинескиот лидер Си Џинпинг му приреди раскошен прием на Трамп и организираше состаноци во симболични државни комплекси, испраќајќи сигнал дека Пекинг сака да се претстави како стабилен и неопходен партнер на САД.
Аналитичарите оценуваат дека главната цел на самитот не е голем историски договор, туку спречување дополнително влошување на односите меѓу двете најголеми светски економии.
И покрај топлите пораки и личните пофалби меѓу Трамп и Си, суштинските разлики остануваат нерешени – од американските царини и технолошките санкции, до кинеските амбиции околу Тајван и доминацијата во производството на напредни технологии.
Но, за разлика од претходните години, овојпат и Вашингтон и Пекинг изгледаат подготвени барем привремено да ја стават економската стабилност пред геополитичката конфронтација.