Демократската унија за интеграција (ДУИ) ги отфрли обвинувањата на коалицијата ВЛЕН дека критиките за проектот на автопатот Скопје–Блаце се мотивирани од приватни интереси поврзани со земјиште, оценувајќи ги како неосновани и како обид за избегнување на суштинската дебата за реализацијата на проектот.
Од ДУИ велат дека прашањата што ги отвораат се однесуваат на текот на реализацијата на автопатот, неговото доцнење и јавните дискусии што се водеа во изминатиот период за можни измени на првичното решение.
„Наместо да одговори зошто проектот беше во застој речиси две години, зошто се отвори прашањето за негово редефинирање и зошто беше доведена во прашање динамиката на реализација на еден од најважните инфраструктурни коридори во земјата, ВЛЕН избира да пласира обвинувања без докази“, се наведува во реакцијата.
Партијата додава дека граѓаните очекуваат одговори за реализацијата на проектот, а не политички препукувања.
ДУИ поставува прашања за причините за доцнењето на проектот, за дискусиите околу можна промена на неговиот карактер и за тоа зошто актуелната власт го претставува како свој успех проектот кој, според нив, бил планиран, финансиски обезбеден и започнат пред нејзиното доаѓање на власт.
Од партијата велат дека доколку постојат докази за какви било незаконски дејствија, тие треба да бидат доставени до надлежните институции.
„ДУИ ќе продолжи да ги поддржува и брани стратешките инфраструктурни проекти и јавниот интерес, додека граѓаните ќе ја дадат конечната оценка за аргументите на двете страни“, се наведува во соопштението.