Меѓународниот монетарен фонд (ММФ) оцени дека економијата на Северна Македонија покажала отпорност и раст од 3,5 проценти во 2025 година, но предупреди дека земјата и натаму бавно се приближува кон животниот стандард на Европската Унија и останува изложена на значителни надворешни ризици.
Во извештајот по редовната консултација според Член IV, Извршниот одбор на ММФ наведе дека растот бил поддржан од инвестициите и приватната потрошувачка, но дека новиот раст на глобалните цени на енергенсите повторно создава инфлаторни притисоци.
ММФ прогнозира економски раст од 3,1 проценти во 2026 година, додека инфлацијата ќе се зголеми на 4,5 проценти. Според проекциите, јавниот долг ќе остане околу 60 проценти од бруто-домашниот производ.
Фондот предупредува дека ризиците за економијата главно доаѓаат од надворешното окружување, вклучително и нестабилните цени на енергијата, послабиот раст кај главните трговски партнери и заострените глобални финансиски услови.
Одборот на ММФ ја поздрави определбата на властите за фискална консолидација, но нагласи дека намалувањето на буџетскиот дефицит на 3,5 проценти од БДП ќе бара конкретни и кредибилни мерки. Препорачано е ограничување на расходите за плати и пензии, намалување на даночните ослободувања и подобрување на ефикасноста на јавните инвестиции.
ММФ оцени дека е потребна доволно рестриктивна монетарна политика за да се задржи инфлацијата под контрола и да се заштити стабилноста на девизниот курс.
Во извештајот се наведува дека банкарскиот сектор останува стабилен и добро капитализиран, но се посочува на ризици од брзиот раст на кредитирањето и изложеноста кон пазарот на недвижности.
Посебно внимание ММФ посветува на структурните слабости на економијата. Институцијата оценува дека се потребни подлабоки реформи за зголемување на продуктивноста, подобрување на управувањето и борба против корупцијата, како и мерки за ублажување на последиците од иселувањето и стареењето на населението.
Според податоците во извештајот, странските директни инвестиции во 2025 година паднале на само 1,5 проценти од БДП, во споредба со 6,6 проценти една година претходно.
ММФ исто така препорачува забрзување на зелената транзиција и инвестиции во енергетска ефикасност со цел да се намали зависноста од увоз на енергенси и да се зајакне енергетската безбедност на земјата.