Соединетите Американски Држави извршија нова серија воздушни напади врз ирански воени цели, втор ден по ред, откако Вашингтон го обвини Техеран за напад со беспилотно летало врз комерцијален танкер во Ормускиот Теснец.
Американската Централна команда (CENTCOM) соопшти дека нападите биле насочени кон иранска воена инфраструктура, вклучувајќи системи за надзор, комуникациски капацитети, противвоздушна одбрана, складишта за беспилотни летала и капацитети за поставување морски мини.
Според CENTCOM, нападите биле извршени по наредба на американскиот претседател Доналд Трамп како директен одговор на, како што наведе, „континуираната иранска агресија врз комерцијалната пловидба“.
Експлозии биле пријавени во јужен Иран, во близина на пристаништето Сирик и на островот Кешм, јавија иранските државни медиуми.
Трамп предупреди дека САД би можеле да преземат уште посилни воени акции доколку Иран продолжи да го крши договорот за прекин на огнот постигнат на 17 јуни.
„Можно е никогаш да не научат. Може да дојде момент кога повеќе нема да можеме да бидеме разумни и ќе бидеме принудени воено да ја довршиме работата што успешно ја започнавме“, напиша Трамп на социјалните мрежи.
Новиот бран напади уследи откако танкерот „Кику“, кој пловел под знаме на Панама, беше погоден од проектил додека минувал низ Ормускиот Теснец. Според американската страна, станува збор за напад со еднонасочен дрон, при што немало жртви ниту истекување на нафта.
Претходно, во четвртокот, беспилотно летало го погоди и контејнерскиот брод „Евер Лавли“, регистриран во Сингапур, што предизвика прв бран американски напади врз Иран.
Во центарот на новата ескалација останува контролата врз Ормускиот Теснец, низ кој во мирнодопски услови поминуваат речиси 20 проценти од светските испораки на нафта и значителни количини природен гас и други стоки.
Според аналитичарите, различните толкувања на меморандумот за прекин на огнот меѓу Вашингтон и Техеран создаваат ризик од целосен колапс на договорот. Иран смета дека сите бродови мора да бидат координирани со неговите власти, додека САД тврдат дека таква обврска не постои за пловидбата низ оманските територијални води.
Американскиот Конгрес, кој неодамна усвои резолуција со која се ограничуваат нови воени акции без претходно одобрување, веќе предупреди дека би можел да преземе дополнителни правни чекори доколку администрацијата продолжи со нападите врз Иран.