Почетокот на издржувањето на едногодишната затворска казна на поранешниот градоначалник на Општина Карпош, Стевчо Јакимовски, е одложен поради неговото барање поднесено од здравствени причини, соопштија од надлежниот суд.
Според информациите од судот, Јакимовски на 12 јуни поднел барање за одложување на извршувањето на казната, повикувајќи се на неговата здравствена состојба.
Судот побарал дополнителна медицинска документација од двете приватни здравствени установи наведени во барањето, но до денес не добил одговор. Поради тоа, на 26 јуни била испратена ургенција до здравствените институции.
Одлуката дали и за колкав период ќе биде одложено издржувањето на казната ќе биде донесена откако судот ќе ја добие и разгледа целокупната медицинска документација.
До тогаш, почетокот на издржувањето на затворската казна останува одложен.
Јакимовски е правосилно осуден на една година затвор во предмет поврзан со незаконска изградба на општинската зграда во Карпош. Во изречената казна ќе му бидат пресметани и петте месеци што претходно ги помина во куќен притвор.