Министерот за здравство Азир Алиу и еврокомесарот за здравство Оливер Вархеј денеска во Брисел го потпишаа договорот за учество на Република Северна Македонија во програмата EU4Health, најголемата програма на Европската Унија во областа на здравството.
На церемонијата на потпишување, Алиу оцени дека приклучувањето кон програмата претставува значаен чекор во европската интеграција на македонскиот здравствен систем и потврда дека реформите во секторот се усогласуваат со европските стандарди и приоритети.
„Со потпишувањето на договорот, нашата држава станува дел од европските напори за зајакнување на здравствените системи, унапредување на јавното здравје, дигитализација на здравствените услуги и подобрување на подготвеноста за здравствени кризи. Ова е инвестиција во поквалитетни услуги за граѓаните, посилни институции и подобри услови за пациентите и здравствените работници“, изјави Алиу.
Тој додаде дека програмата ќе обезбеди дополнителна европска поддршка, експертиза и партнерства за спроведување на реформските процеси во здравството.
Според министерот, потпишувањето на договорот испраќа порака дека Северна Македонија својата европска определба ја претвора во конкретни политики и можности за граѓаните.
Учеството во EU4Health ќе им овозможи на македонските здравствени институции и експерти да се вклучат во европски мрежи, заеднички проекти и иницијативи насочени кон подобрување на здравствените политики, дигиталната трансформација и квалитетот на здравствените услуги.
Програмата EU4Health е најголемата европска иницијатива во областа на здравството, создадена за зајакнување на отпорноста на здравствените системи, поддршка на иновациите и подобрување на јавното здравје во земјите учеснички.