Иран го обвини НАТО за „активно соучество“ во американско-израелската војна против Техеран, откако генералниот секретар на Алијансата, Марк Руте, откри дека повеќе европски сојузници им ставиле на располагање бази и логистичка поддршка на американските сили.
Руте, кој престојува во Вашингтон во обид да ги намали тензиите меѓу САД и европските членки на НАТО, изјави дека „сојузник по сојузник“ обезбедувале поддршка за американските операции против Иран. Тој рече дека меѓу 4.000 и 5.000 американски летови полетале од бази во Европа за време на шестнеделната војна.
Според Руте, околу 500 американски авиони полетале од бази во Италија, додека Романија го ограничила комерцијалниот авиосообраќај за да овозможи користење на аеродромска инфраструктура за американските сили.
Американскиот претседател Доналд Трамп претходно изрази незадоволство од дел од европските сојузници, оценувајќи дека Италија, Велика Британија, Германија, Франција и Шпанија не дале доволна поддршка за американската кампања против Иран.
Иранското Министерство за надворешни работи остро реагираше на изјавите на Руте, оценувајќи дека тие претставуваат признание за вмешаност на НАТО во, како што наведе Техеран, „незаконска агресивна војна против суверена држава членка на ОН“.
Портпаролот на иранското МНР, Есмаил Багаеи, порача дека НАТО и земјите членки што учествувале во поддршката мора да одговараат за последиците.
Италија веднаш се дистанцираше од изјавите на Руте. Министерот за одбрана Гвидо Крозето рече дека генералниот секретар на НАТО испратил „целосно погрешна порака“, мешајќи логистички и технички летови со борбени операции. Тој нагласи дека Рим дозволил само неборбени активности, во согласност со уставот, меѓународните договори и билатералните аранжмани со САД.
Неколку европски земји формално ја поддржаа американската кампања против Иран, но избегнаа директно воено учество, наведувајќи дека конфликтот „не е европска војна“. Дел од владите изразија и правни резерви поради сомнежи околу легалната основа за нападите.
Тензиите меѓу Вашингтон и европските сојузници се продлабочија и поради барањето на Трамп земјите членки на НАТО да ја зголемат одбранбената потрошувачка до 5 проценти од БДП. Руте, пак, се обиде да го убеди американскиот претседател дека Европа сепак обезбедила значајна логистичка и воена поддршка за САД.
Годишниот самит на НАТО треба да се одржи во Анкара за две недели.