Американските медиуми објавија дека Пентагон го зголемил нивото на контраразузнавачка закана поврзана со Израел на највисока категорија, поради сомнежи дека израелските разузнавачки служби се обидувале да прибираат информации за чувствителни американски дискусии околу конфликтите со Иран и Либан.
Според извештаи на Ен-Би-Си Њуз и Њујорк Тајмс, кои се повикуваат на сегашни и поранешни американски функционери, американските служби регистрирале активности што ги надминуваат вообичаените разузнавачки операции меѓу сојузнички држави.
Во извештаите се наведува дека потенцијални цели на следење биле специјалниот пратеник на претседателот Доналд Трамп, Стив Виткоф, високи претставници на Пентагон и функционери задолжени за политиката кон Блискиот Исток.
Медиумите тврдат дека во интерен извештај биле наведени повеќе инциденти, вклучувајќи случаи во кои американски воени лица во Израел откриле софтвер способен за следење комуникации на нивните уреди.
Белата куќа категорично ги отфрли наводите.
„Целата приказна е неточна и се темели на извори кои немаат сознанија за тоа што навистина се случува“, изјавил претставник на американската администрација.
Израелската амбасада во Вашингтон исто така ги демантираше обвинувањата.
„Израел не собира разузнавачки информации за американски институции, а уште помалку за американски владини претставници. Нашите разузнавачки активности се насочени кон непријателите, а не кон сојузниците“, соопшти амбасадата.
Наводите доаѓаат во период на растечки несогласувања меѓу американскиот претседател Доналд Трамп и израелскиот премиер Бенјамин Нетанјаху околу стратегијата кон Иран и конфликтот во Либан.
Според американските медиуми, Вашингтон е повеќе наклонет кон дипломатски преговори со Техеран, додека Нетанјаху поддржува поагресивен пристап и дополнителни воени операции против иранските цели и Хезболах.
И покрај наводните безбедносни грижи, американските функционери тврдат дека размената на разузнавачки информации меѓу двете земји продолжува без прекин.
Обвинувањата повторно го актуализираа случајот со Џонатан Полард, американски разузнавач осуден во 1985 година за шпионирање во корист на Израел, што и денес останува една од најголемите шпионски афери во односите меѓу двете сојузнички држави.