Родителите на жртвите од пожарот во „Пулс“ обвинуваат за игноранција, навреди и институционален молк
Родителите на 62-та млади кои загинаа во катастрофалниот пожар во дискотеката „Пулс“ во Кочани на 16 март годинава, ја обвинија Владата за игнорирање на нивните барања, непочитување и навредлив однос при официјалната средба со премиерот Христијан Мицкоски, одржана на 7 јули во Скопје.
Во писмено соопштение објавено во четвртокот навечер, граѓанската иницијатива „16-ти Март 2025 Кочани“, формирана од семејствата на загинатите, изнесе серија обвинувања против институциите, тврдејќи дека средбата со премиерот наместо утеха и поддршка, завршила со „понижување и вторична траума“.
Родителите велат дека испратиле писмени барања до тројцата највисоки функционери во државата – премиерот, претседателката Гордана Сиљановска-Давкова и претседателот на Собранието Африм Гаши – на 1 јули, но добиле одговор само од Кабинетот на премиерот, кој телефонски закажал средба во Владата за 7 јули.
„Иако инсистиравме средбата да се одржи во Кочани, од безбедносни причини беше одбиено, па патувавме во Скопје во најтешка жештина и во најтешка болка“, се вели во соопштението.
Околу 60 родители и членови на семејствата присуствувале на средбата со Мицкоски, но, според нив, наместо сочувство и човечка поддршка, биле дочекани со формален поздрав и „незаинтересиран однос“. Премиерот, како што тврдат, изјавил дека го гледа нивното барање „првпат“, иако претходно било заведено во Владата.
Дополнително, како што наведуваат родителите, портпаролката на Владата Марија Митева објаснила дека барањето било архивирано на 3 јули, препратено до други институции на 4 јули, и лично врачено на премиерот дури на 7 јули – истиот ден кога се одржала средбата.
„Навредата што никогаш нема да ја заборавиме“ – така родителите ја опишуваат изјавата на премиерот по разгледување на нивната прва точка од барањето, со која побарале еднократна финансиска поддршка преку државниот фонд. Според соопштението, Мицкоски рекол:
„Ова барање е исто како предлогот на СДСМ, само што вие немате ставено цена. Одредете си цена за вашите деца.“
Родителите оценија дека овие зборови преставуваат „смрт на достоинството“ и „второ убиство“ на нивните деца.
„Ниту еден родител не смее да слушне вакви зборови. Тоа беше газење врз спомените, болката и човечкото достоинство“, стои во соопштението.
Од Владата сè уште нема официјален одговор на обвинувањата. Ројтерс побара коментар од Кабинетот на премиерот и портпаролката Митева, но не доби веднаш реакција.
Родителите тврдат дека и покрај поминатите четири месеци од трагедијата, нема започнато судска постапка, а осомничените лица сè уште се на слобода. Тие бараат итна правда, обесштетување и одговорност од сите инволвирани во инцидентот, кој се смета за најголема цивилна трагедија во поновата историја на Северна Македонија.
„Ако не знаете да ја водите државата, отстапете го местото на некој што има совест и храброст“, порачуваат во соопштението.
Тие најавуваат дека нема да се откажат од борбата, се додека не се спроведе правда за, како што велат, „масовното убиство на 62 млади животи“.
– КРАЈ –