Швајцарија останува најскапата европска земја за потрошувачките добра и услуги, додека Турција е најевтина меѓу 36 европски земји опфатени со анализата на Евростат, пренесе Euronews, повикувајќи се на најновите податоци за ценовните нивоа.
Во рамките на Европската Унија, Данска е најскапата земја, со цени околу 40% над просекот на ЕУ, додека Бугарија е најевтина, со цени 37% под европскиот просек. По Данска следуваат Ирска, Луксембург и Финска, додека Романија е веднаш зад Бугарија меѓу најевтините членки на Унијата.
Според податоците, западните и северните европски земји имаат највисоки трошоци за живот, додека земјите од Балканот и Источна Европа остануваат значително поевтини. Надвор од ЕУ, по Швајцарија следуваат Исланд и Норвешка меѓу најскапите европски држави.
Меѓу земјите кандидати за членство во ЕУ, Северна Македонија, Србија, Црна Гора, Албанија, Босна и Херцеговина и Турција имаат ценовни нивоа под просекот на Унијата, што ги прави поевтини за живот и потрошувачка во споредба со повеќето членки на ЕУ.
Евростат нагласува дека разликите во цените се важни при споредбата на економските показатели и животниот стандард, бидејќи повисоките цени не секогаш значат и поголема куповна моќ на населението.