Коалицијата ВЛЕН побара од институциите на Албанија да објаснат дали постои мерка за забрана за влез на нејзини функционери, откако пратениците Беким Ќоку и Аднан Азизи и заменик-генералниот секретар на Владата, Хасим Муртезани, биле задржани на граничниот премин Ќафасан.
ВЛЕН соопшти дека тројцата функционери патувале со дипломатски пасоши и дека околу еден час чекале на преминот без да добијат официјално решение, документ или образложение. Од партијата велат дека неофицијално им било кажано оти постои забрана за влез во Албанија.
„Бараме од властите на Република Албанија да ја информираат јавноста дали навистина постои таква мерка, кој ја донел, врз која законска основа и кои се конкретните причини“, соопшти ВЛЕН.
Албанската гранична полиција тврди дека на тројцата функционери не им бил забранет влез, туку дека проблем имал четвртиот патник со кого патувале. Според оваа верзија, тие можеле да продолжат, но сами решиле да се вратат.
Порталот ТетоваСот, повикувајќи се на неофицијални информации, објави дека Албанија ставила повеќе од 60 лица, главно функционери на ВЛЕН, на „црна листа“, поради сомнежи за организирање млади лица за учество на протестот на 4 јули во Тирана.
Во јавноста се појавија и тврдења дека случајот не е поврзан само со протестите. Експертот за безбедност Ервин Карамуќо изјави дека дел од лицата биле под мониторинг на албанските институции поради сомнежи за активности финансирани од земји од Блискиот Исток што, според него, „не се пријателски кон Албанија“.
ВЛЕН оцени дека меѓуалбанските односи треба да се градат врз транспарентност, институционална почит и јасна комуникација, а не врз, како што велат, необјаснети забрани што оставаат простор за сомнежи.