Еврокомесарката за проширување Марта Кос и претседателот на Собранието Африм Гаши оценија дека Северна Македонија бележи напредок во спроведувањето на клучните реформи, врз основа на кои Европската Унија одобри 142,1 милиони евра преку Планот за раст за Западен Балкан.
На средбата, на која присуствуваа претставници на власта и опозицијата, беше истакната потребата од широка меѓупартиска поддршка за реформите поврзани со европската интеграција.
Гаши оцени дека Планот за раст претставува значаен инструмент за забрзување на економскиот и социјалниот развој на земјата и регионот, додека Кос ја потврди континуираната поддршка на Европската Унија за европската перспектива на Северна Македонија.
Претходно, по средбата со премиерот Христијан Мицкоски, Кос изјави дека земјата има место во Европската Унија, но дека уставните измени остануваат неопходен услов за продолжување на пристапниот процес. Таа ја пофали Владата за напредокот во спроведувањето на Реформската агенда, што овозможи дополнителна финансиска поддршка од ЕУ.
Мицкоски изјави дека Владата покажала конкретна посветеност на реформите и ја поздрави финансиската и експертската поддршка од Европската комисија, додавајќи дека очекува процесот на евроинтеграција да не биде условуван со билатерални прашања.