Американскиот претседател Доналд Трамп најави царини од 50 отсто за широк спектар производи од Канада, а канадскиот премиер Марк Карни изјави дека Владата ги разгледува „сите опции“ за одговор на новата ескалација во трговскиот спор меѓу двете соседни земји.
Царините треба да стапат во сила за 30 дена и ќе опфатат производи како вино, хокеарски палки и цемент, како и дел од автомобилите, млечните производи и алкохолните пијалаци.
Од мерката ќе бидат изземени некои од клучните канадски извозни производи, меѓу кои енергенсите, калиумовите соли, критичните минерали и рибата.
Трамп рече дека мерките се одговор на, како што го нарече, нееднаквиот третман на американските автомобили, земјоделски производи и алкохол на канадскиот пазар.
„Канада беше многу, многу остра кон нас со години“, рече Трамп, додавајќи дека претходните американски претседатели не презеле ништо.
Карни соопшти дека разговарал со Трамп и дека двајцата лидери се согласиле да ги интензивираат трговските преговори.
Сепак, канадскиот премиер предупреди дека Отава не исклучува ниту една мерка.
„Сите опции се на маса“, рече Карни, додавајќи дека Канада во изминатите 18 месеци ја зајакнала домашната потрошувачка и отворила нови трговски канали со други земји.
Премиерот на Онтарио, Даг Форд, повика Канада да одговори со идентични царини доколку Вашингтон ја спроведе најавената мерка.
„Царина за царина, долар за долар“, рече Форд.
Нов удар врз северноамериканската трговија
САД веќе применуваат царини од 15 до 50 отсто за канадски челик, алуминиум и бакар, царина од 35 отсто за меко дрво и давачка од 25 отсто за автомобилските делови што не се произведени во САД.
Канада, пак, има контрацарини од 25 отсто за избрани американски производи од челик, алуминиум и автомобилскиот сектор.
Белата куќа соопшти дека новите царини ќе важат и за стоки опфатени со Договорот меѓу САД, Канада и Мексико, познат како УСМЦА.
Карни рече дека тоа претставува нов едностран американски потег и директно прекршување на договорот за слободна трговија.
Трамп ги образложи мерките со три клучни спора – автомобилите, млечните производи и алкохолот.
Вашингтон ја обвинува Канада дека ги дискриминира американските автомобили и делови што не ги исполнуваат условите од УСМЦА, дека воведува царини до 300 отсто за млечни производи над увозните квоти и дека канадските провинции ги бојкотираат американските алкохолни пијалаци.
Неизвесност околу УСМЦА
САД годинава одбија договорот УСМЦА да биде автоматски продолжен во сегашната форма и побараа измени, додека Канада и Мексико се залагаа за негово обновување.
Договорот сепак ќе продолжи да ја регулира северноамериканската трговија, но ќе подлежи на годишни ревизии.
Економистот Мајкл Деверо од Универзитетот на Британска Колумбија оцени дека новите царини се значителна ескалација, бидејќи директно погодуваат производи што претходно биле ослободени според договорот потпишан во првиот мандат на Трамп.
Трамп тврди дека царините ќе ги зајакнат американското производство и вработувањето, но економистите предупредуваат дека повисоките увозни давачки може да ги зголемат цените за потрошувачите.