Американски морнарички хеликоптер и борбен авион се урнаа во неделата во Јужното Кинеско Море во два одделни инциденти, при рутински операции од носачот на авиони USS Nimitz, соопшти Пацифичката флота на САД.
Хеликоптерот MH-60R Sea Hawk, припаѓал на ескадрилата „Battle Cats“ од Helicopter Maritime Strike Squadron 73, и се урнал околу 14:45 часот по локално време. Тројцата членови на екипажот биле безбедно спасени, се наведува во соопштението.
Околу половина час подоцна, во 15:15 часот, во морето се урнал и борбениот авион F/A-18F Super Hornet, дел од ескадрилата „Fighting Redcocks“ на Strike Fighter Squadron 22, исто така при рутински лет од носачот Nimitz. Двата пилоти успешно се катапултирале и биле спасени.
Двете ескадрили се базирани во Калифорнија – хеликоптерската единица на Naval Air Station North Island во Сан Диего, а ескадрилата на борбените авиони во Naval Air Station Lemoore, во окрузите Кингс и Фресно.
Пацифичката флота соопшти дека се спроведува истрага за причините на двата инцидента. Министерството за одбрана одби да даде коментар, упатувајќи ги прашањата кон Морнарицата, која не одговори веднаш.