Владејачката ВМРО-ДПМНЕ ја обвини локалната власт во Гостивар за неодговорно управување и задоцнета реакција откако повеќе од 1.000 жители побарале лекарска помош со симптоми на дијареа, повраќање, температура и стомачни болки.
Мартин Андоновски, претседател на општинскиот комитет на ВМРО-ДПМНЕ во Гостивар, рече дека коалицијата составена од СДСМ, ДУИ и политичките структури поврзани со Арбен Таравари ги оставила граѓаните без безбедна вода и без навремени одговори.
„Додека славеа по изборите, сè беше добро, а денес, кога треба реакција и одговорност, ги нема“, рече Андоновски во партиско соопштение.
Тој побара одговори зошто локалните служби не реагирале порано и дали некој ќе понесе политичка и институционална одговорност.
„Над 1.000 наши сограѓани директно или индиректно завршија во болница. Бараме целосен расплет на случајот“, рече Андоновски.
Тврдењето дека пациентите биле отруени поради несовесно управување на локалните институции засега не е потврдено со официјални лабораториски наоди. Обвинителството и здравствените институции испитуваат дали водата од градскиот водовод е изворот на заболувањата или причината е друг инфективен фактор.
Се очекува прогласување епидемија
Институтот за јавно здравје соопшти дека бројот на пациенти го надминал прагот за прогласување епидемија на заразна болест на подрачјето на Гостивар.
Во последното деноноќие биле извршени повеќе од 350 прегледи на лица со симптоми на гастроентероколит, а неколку пациенти биле хоспитализирани, според информациите објавени од здравствените власти.
Институтот им препорача на жителите да не ја користат водата од градскиот водовод за пиење, готвење, миење храна или одржување лична хигиена, ниту по превривање, сè додека не бидат објавени конечните резултати.
На граѓаните им се препорачува да користат флаширана или вода обезбедена од цистерни.
Лабораториските анализи на примероците од водата треба да бидат доставени до Јавното обвинителство, кое потоа ќе одлучува за натамошните чекори.
Партиска пресметка околу одговорноста
Андоновски во изјавата го нападна и лидерот на СДСМ и поранешен министер за здравство Венко Филипче, поврзувајќи ја актуелната криза со пожарот во модуларната болница во Тетово во 2021 година и со управувањето со пандемијата на коронавирусот.
СДСМ, од друга страна, побара здравствените институции веднаш да прогласат епидемија и обвини дека реакцијата на централните власти била бавна.
Партијата соопшти дека прогласувањето епидемија би овозможило подобра координација, дополнителни ресурси и поефикасни мерки за спречување на ширењето на инфекцијата.
Локалната власт во Гостивар претходно соопшти дека нема конечни докази дека водата е причината за заболувањата и ги повика граѓаните да ја почитуваат привремената забрана до завршувањето на анализите.
Причината останува непозната
Министерот за здравство Сашо Клековски рече дека во истрагата се проверуваат повеќе можни причинители, вклучително бактерии, вируси, паразити и присуство на штетни материи.
Тој ги повика жителите да соработуваат со епидемиолозите и да ги пополнуваат анкетите за храна, вода, движење и контакти во деновите пред појавата на симптомите.
Додека не бидат објавени лабораториските резултати, не може да се утврди дали станува збор за загадување на водоводот, вирусна епидемија или друг извор на инфекција.
Политичките обвинувања за директна вина на локалната власт остануваат партиски тврдења што треба да бидат проверени од здравствените и истражните институции.