Лидерот на Движењето ЗНАМ, Максим Димитриевски, изјави дека големите политички партии се плашат од растот на неговата партија, оценувајќи дека ЗНАМ се етаблира како самостоен политички субјект кој не работи во интерес на други центри на моќ.
Говорејќи на трибина во Тетово, Димитриевски рече дека ЗНАМ влегол во Владата со цел да спроведува реформи, но и да биде коректив кога ќе биде неопходно.
„Не влеговме во политиката за да бидеме продолжена рака на некого, туку за да изградиме политички субјект кој ќе се бори за држава со ред, систем и одговорност“, изјави Димитриевски.
Тој додаде дека европска Македонија е држава во која граѓаните имаат доверба во институциите, младите гледаат перспектива дома, а одлуките се носат врз основа на принципи, а не на политички интереси.
Според него, учеството на ЗНАМ во владината коалиција е мотивирано од желбата да се реализираат реформи, но и да се реагира кога ќе биде загрозен јавниот интерес или принципите на кои се темели движењето.
Во рамки на трибината, генералниот секретар на ЗНАМ и министер за јавна администрација, Горан Минчев, ги претстави реформите во јавната администрација и активностите за изградба на професионални и функционални институции.
Министерот за земјоделство, шумарство и водостопанство и потпретседател на ЗНАМ, Борче Серафимовски, говореше за мерките за поддршка на земјоделците, развојот на домашното производство и рамномерниот регионален развој како предуслов за поконкурентна економија.